DEBBO

Mi sifoo ngonka ma e mbaadi ma.
E nguu ndewaagu ngu joome waɗma.
Ko e boli peewal o tagruma.
Ko a cinndaaɗo jarribaaji.
Ooñiiɓe ko borjere maaɗa tijji.
‘Arooɓe ina mbilira gite ma moosooji.
‘A anndataa jiɗɗo ma e gaño ma e ɗii dooñooji.
Aɗa foti anndude hoyre ma e ŋari mo Geno luɓri ma.
Ɗo ndewɗaa kala ndewneɗaa gite.
Saa welsindiima njookeɗaa boli mette.
Arewii tan mbaadi ma, haa a faaytii fotde ma.
Kala ɗo ndewɗaa aɗa ƴeɓa, aɗa waklita yahdu ma.
Aɗa wukkit uuranteeri ma.
Ndeke ɓee raddooɓe ina tuufi ma.
Julotooɓe peeje ina toɓɓu ma.
Saa reentaaki bone maɓɓu ma.
Aɗa foti ndurnode miijo e ko moƴƴinta ngonka ma.
Sahaa maa ko daɓɓo, ko bonnantu ma no yaawi.
Ngam ɓernde ma e cukaagu no leewi.
Ngati ko ruɓanta ma ina heewi.
Ko hoomtu ma e yeeso ma ina geewi.
Ndeke gonal maaɗa no farwi.

SUKA DEBBO JOM ŊARI

Heɗto giɗo maa no waajo ma.
Mo ɗaminaaki fes e ma.
Ko yiɗde cooroɗaa cuɗoɗaa e mbaadi-ma.
Ngam debbo ko yomma leñol.
Nehoowo, mahoowo, ooñoo ɓesngu majja bolol.
Renndo moƴƴat koy darnde ma.
Loloɗaa ngo falja e yeebaare ma.
Ñaantaade e suɗaade tan wanaa ko addu-ma.
Kaa jom geɗal e teddungal e leydi ma.
Ɓarfito, sirŋino, yooɗnaade wanaa tan darnde ma.
Aɗa foti jikkaade jikku, rewɓe faarnorteeɓe e leñol ma.
Kaa ngooroondi peewal leydi ma.
Ɓamtoowo araraay moƴƴere duunde ma.
Saa faamii darnde ma, aɗa foti yahɓande fotde ma.

E kuɗol Demmba Kah mo Teekaan, maa Woro taan Bakar Sih.

Leave a Reply